काठमाडौं- साउदी अरबमा हुने वाफ महिला च्याम्पियनसिपमा सहभागी जनाउने नेपाली राष्ट्रिय महिला फुटबल टोलीको बिदाइ गरिएको छ ।

शुक्रबार एन्फा कम्प्लेक्स सातदोबाटोमा एन्फाका अध्यक्ष पंकजविक्रम नेम्वाङलगायतले नेपाली टोलीको बिदाइ गरेका हुन् । फागुन ७ गतेबाट सुरु हुने च्याम्पियनसिपमा नेपाल रहेको समूहमा प्यालेस्टाइन, सिरिया र इराक रहेका छन् भने अर्को समूहमा अर्को समूहमा साउदी, लेबनान लगायत छन् ।

बिदाइ कार्यक्रममा मुख्य प्रशिक्षक राजेन्द्र तामाङले जितको लक्ष्यका साथ मैदान उत्रिने बताए । उनले आफूहरुको तयारी पनि राम्रो भएको जानकारी दिए । उनले टिमलाई बलियो बनाउन ग्रासरुटलाई नै बलियो बनाउदै लैजानुपर्नेमा जोड दिए ।

त्यस्तै, राष्ट्रिय महिला फुटबल टीमकी कप्तान एन्जिला तुम्बापो सुब्बाले वाफ महिला च्याम्पियनसिप अवसरको रुपमा लिएको र उपाधि जित्ने लक्ष्यका साथ मैदान उत्रने बताइन् ।

नेपालले फागुन ८ गते सिरिया, फागुन १० गते इराक र फागुन १२ गते प्यालेस्टाइनसँग खेल्नेछ । समूह चरणपछि समूहका शीर्ष दुई टोली सेमिफाइनलमा प्रवेश गर्नेछ । यसअघि फ्रान्समा व्यवसायिक फुटबल खेलिरहेकी सावित्रा भण्डारी सम्बासहित २३ सदस्यीय टोलीको घोषणा भइसकेको छ ।