काठमाडौं – इंग्लिस प्रिमियर क्लब म्यान्चेस्टर युनाइटेडका प्रशिक्षक ओले गनर सोल्सायरले मिडफिल्डर पाउल पोग्वा युनाइटेडमै रहने बताएका छन् । उनले शनिबार राति मिडियासँग कुरा गर्दै पोग्वा युनाइटेडमै रहनेमा कुनै शंका नरहेको स्पष्ट पारे ।

नयाँ सिजन शुरु हुनु अगाडि सरुवा बजार खुल्ला रहेको हुँदा पोग्वाले युनाइटेड छाड्ने सम्भावना रहेको आँकलनका बीच सोल्सायरले आफ्ना स्टार खेलाडीले नयाँ सिजन पनि युनाइटेडबाटै खेल्ने बताएका हुन् ।

पोग्वाले स्पेनिस महारथि रियल मड्रिड जान चाहेको कुरा बजारमा हल्ला भइरहँदा सोल्सायरले आफ्ना स्टार यो सिजन पनि युनाइटेडमै रहने बताएका हुन् ।
प्रि सिजनको अन्तिम एसी मिलानसँगको खेलमा पोग्वा कार्डिफ गएका थिएनन् । उक्त कुरालाई स्पष्ट पार्दै सोल्सायरले भने,‘मैले तयारीका क्रममा उनीसँग कुरा गरेको थिए । पोग्वालाई यात्रा गर्न कठिन थियो । तर, त्यो चोट नभएर दुखाइ मात्रै हो ।’