मालदिभ्सको विकट भिलिङ्गिली टापुमा १३ वर्षीय बालकको दुःखद निधन भयो । ब्रेन ट्युमरबाट पीडित १३ वर्षीय बालक मोहम्मद जाह खालिदको स्वास्थ्यमा अचानक समस्या आएपछि उनलाई एअर एम्बुलेन्सबाट उद्धार गरी राजधानी माले लैजाने तयारी गरिएको थियो । उनको परिवारले पनि एअर एम्बुलेन्सका लागि आग्रह गरेका थिए ।

तर, जहाजमा प्राविधिक गडबडी देखियो । भारतले प्रदान गरेको जहाजबाट पनि उद्धार हुनसक्थ्यो, तर, त्यहाँका राष्ट्रपति मोहम्मद मुइज्जुले भारतले दिएका एअर एम्बुलेन्सको प्रयोगमा बन्देज लगाएका कारण ती बालकले समयमै उपचार पाएनन् र दुःखद निधन भयो । यस घटनाले भारतविरोधी मुइज्जु सरकारको निर्णयमाथि नै प्रश्न उब्जाएको छ ।

मुइज्जुको यस्तै भारतविरोधी भाष्यका कारण दुई मुलुकबीचको सम्बन्ध निकै चिसिएको छ । मुइज्जुले मुलुकमा रहेका भारतीय सुरक्षाकर्मी तत्काल बाहिरिनुपर्ने माग राखेर चुनाव लडेका थिए ।

मुइज्जुको कार्यकालमा भारत र मालदिभ्सबीचको कूटनीतिक सम्बन्ध थप बिग्रिने धेरैको बुझाइ छ । मुइज्जु चीनपरस्त नेता मानिन्छन् । चीनबाट प्राप्त हुने आर्थिक लाभमात्रै हेर्ने गरेको भन्दै आलोचना खेप्दै आएका मुइज्जुको पालामा मालदिभ्स पनि चिनियाँ ऋणको पासोमा पर्ने आँकलन पनि हुँदै आएको छ ।

मालदिभ्सले भारतीय सुरक्षाकर्मीलाई आफ्नो मुलुकबाट बाहिरिनका लागि मार्च १५ सम्मको म्याद दिएको छ । यसबाट दुई मुलुकबीच तनावमात्रै बढेको छैन, कूटनीतिक सम्बन्ध पनि चिसिएर गएको छ ।

भारतले यस समस्याको समाधान गर्न दुबै मुलुकका सदस्य सम्मिलित उच्चस्तरीय समिति बनउने बताएको छ । भारतीय सेनालाई आफ्नो देशबाट निकाल्ने मिति हठात् घोषणा गर्ने र स्वास्थ्य संकटका बेला पनि आफ्नो मुलुकमा रहेका भारतीय हेलिकोप्टरको प्रयोग गर्न अस्वीकार गर्ने कदमले मुइज्जुको सरकार आफ्ना जनताको सेवा गर्नभन्दा पनि सस्तो राजनीतिक बाजी जित्न अग्रसर रहेको प्रष्ट हुन्छ ।

मुइज्जुको चीनपरस्त नीति र ‘भारत बाहिर’ अभियानबाट यस क्षेत्रमा अस्थीरता निम्तिने जोखिम बढेर गएको छ । यस क्षेत्रमा चिनियाँ प्रभाव र मालदिभ्सको रणनीतिक संलग्नताले भारत र मालदिभ्सबीच कायम ऐतिहासिक सम्बन्धमात्रै बिगारेको छैन, यस क्षेत्रको भू राजनीतिक सन्तुलनलाई प्रभावित बनाउनसक्छ ।

अन्तर्राष्ट्रिय समुदाय खासगरी भारतले मुइज्जुको मागलाई निकै चासोपूर्वक हेरेको छ । यद्यपि मुइज्जु सरकारलाई कुनै किसिमको कूटनीतिक चिन्ताले सताएको छैन । यसबाट मालदिभ्स थप एक्लिने जोखिम पनि बढ्दै गएको छ ।