काठमाडौं– राष्ट्रियसभा निर्वाचनमा कोशी प्रदेशमा एमाले र राष्ट्रिय प्रजातन्त्र पार्टीको तालमेल गर्ने सहमति भएको छ । 

उनीहरूबीच कोशीमा राप्रपाका उम्मेदवार उद्धव पौडेल र एमालेकी रुक्मिणी कोइरालालाई जिताउने सहमति भएको हो । 

राप्रपाका प्रवक्ता मोहन श्रेष्ठले खबरहबसँग भने, ‘हामी दुवै पार्टीबीच लिखित सहमति भएको छ ।’

राप्रपाको तर्फबाट कोशी प्रदेश अध्यक्ष राम थापा र एमालेका तर्फबाट कोशी प्रदेश अध्यक्ष घनश्याम खतिवडाले सहमति पत्रमा हस्ताक्षर गरेका छन् ।

कोशीमा आफ्नो राजनीति सुरक्षित बनाउन एमाले अध्यक्ष केपी शर्मा ओली र राप्रपा अध्यक्ष राजेन्द्र लिङ्देन दुवैलाई एक अर्काको साथ चाहिएको छ । यसअघि पनि झापामा ओलीको निर्वाचन क्षेत्रमा राप्रपाले सहयोग गर्दै आएको छ भने लिङदेनको क्षेत्रमा एमालेले राप्रपालाई सघाउँदै आएको छ ।

कोशी प्रदेशमा एमाले र राप्रपा मिल्दा पनि गठबन्धनको मतभार केही बढी देखिन्छ । तर, कांग्रेसभित्र अन्तरघात भएमा कृष्ण सिटौला जोखिममा पर्न सक्छन् ।

कोशीमा गठबन्धन दलसँग ५ हजार ४३६ मतभार छ । यता एमालेसँग ४ हजार २४८ मात्रै मत छ । राप्रपासँग ३ सय ९४ र स्वतन्त्रसँग ५७ मतभार छ । एमाले, राप्रपा र स्वतन्त्रको सबै जोड्दा पनि गठबन्धनको भन्दा कमै हुन्छ ।

यो पनि…

राष्ट्रियसभा निर्वाचन : कृष्ण सिटौला कति सुरक्षित ?