एजेन्सी– भारत प्रशासित कश्मीरको पुलावामामा भएको आत्मघाती आक्रमणपछि भारत प्रशासित जम्मु कश्मीरको सरकारले कश्मीरका पृथकतावादी नेताहरुलाई दिँदै आएको सुरक्षा व्यवस्था फिर्ता गरेको छ ।

कश्मीरका पृथकतावादी नेताहरु मिरवाज उमर फरुख, अब्दुल घानी भट, बिलाल लोन, हाशिम कुरेशी र शबिर शाहलाई सरकारले दिँदै आएको सुरक्षा व्यवस्था तथा अन्य सरकारी सुविधा फिर्ता गरिएको हो ।

भारतीय गृहमन्त्री राजनाथ सिंहले गत शुक्रबार जम्मु कश्मीरको भ्रमण गरी पृथकतावादी नेताहरुलाई दिइँदै आएको सम्पूर्ण सरकारी सेवा फिर्ता गर्न निर्देशन दिएपछि जम्मु कश्मीर सरकारले यस्तो कदम चालेको हो ।

उनीहरुमध्ये केहीले पाकिस्तानको गुप्तचर निकाय इन्टरसर्भिस इन्टिलिजेन्स आइएसआईबाट पैसा लिँदै आएको र भारतविरोधी गतिविधिमा संलग्न रहेको आरोप लाग्दै आएको छ ।

उनीहरुलाई दिइएको सबै सरकारी सुविधा आइतबार बेलुकीबाट फिर्ता गरिने र कुनै पनि हालतमा फेरि उपलब्ध नगराइने भारतीय सञ्चारमाध्यमले जनाएका छन् । यस्तै सेवा लिएका अरु कोही पृथकतावादी नेताहरु पनि भेटिए उनीहरुको सेवा पनि फिर्ता लिइने प्रहरीको भनाइ छ ।