काठमाडौं– सरकारले बालबालिकाको स्तनपानको अधिकार सुनिश्चित गर्न सबै स्थानीय तहमा स्तनपान कक्ष स्थापना गर्न लागेको छ ।

स्वास्थ्य तथा जनसंख्या मन्त्रालयले प्रजनन स्वास्थ्य ऐनको प्रावधानलाई कार्यान्वय गर्न ७ सय ५३ वटै स्थानीय तहमा स्तनपान कक्ष स्थापना गर्न लागेको हो ।

स्थानीय तहहरुमा स्तनपान कक्ष सञ्चालन गर्न स्वास्थ्य मन्त्रालयले सबै पालिका र प्रदेश कार्यालयहरुलाई परिपत्र गर्ने तयारी भएको परिवार स्वास्थ्य महाशाखाका पोषण शाखाका प्रमुख केदार पराजुलीले बताए ।

प्रजनन स्वास्थ्य ऐनमा सरकारी संरचनामा अनिवार्य रुपमा स्तनपान कक्ष हुनुपर्ने व्यवस्था रहेको छ । सोहि प्रावधान कार्यान्वयनका लागि स्वास्थ्य सेवा विभागले गत वर्ष नै स्तनपान कक्ष बनाइसकेको छ ।

यस्तै राजधानीका विभिन्न सरकारी निकायहरुले पनि कार्यालयमा कार्यरत महिला तथा सेवाग्राहीलाई लक्षित गर्दै स्तनपान कक्ष बनाउन शुरु गरेका छन् ।

नेपाल जनसांख्यिक सर्वेक्षणका अनुसार नेपालमा पूर्ण रुपमा स्तनपान गराउनेको संख्या ६६ प्रतिशत रहेको छ । यस्तै शिशु जन्मेको एकघण्टाभित्र स्तनपान गराउनेको संख्या ५५ प्रतिशत मात्रै रहेको छ ।