काठमाडौं – आगामी मंसिरमा काठमाडौं र पोखरामा आयोजना हुन लागेको १३ औं दक्षिण एसियाली खेलकुद (साग) का लागि यु–२३ फुटबल टोलीले आजदेखि बन्द प्रशिक्षण थालेको छ । यु–२३ राष्ट्रिय फुटबल टोलीका मुख्य प्रशिक्षक बाल गोपाल महर्जनले आजदेखि सागका लागि अभ्यास शुरु गर्न लागेको जानकारी दिए ।

अखिल नेपाल फुटबल संघ (एन्फा) मैदान सातदोबाटोमा युवा टोलीले आजदेखि अभ्यास शुरु गर्न लागेको प्रशिक्षक महर्जनले बताए । बिहीबारदेखि अभ्यास शुरु भएपनि कुन सिफ्टमा कसरी अभ्यास गर्ने भन्ने अहिले टुङ्गो नलागेको बताउँदै महर्जनले मैदान व्यस्त रहेकाले सबै तालिका हेरेर आइतबारदेखि नियमित रुपमा अभ्यास शुरु हुने जानकारी दिए ।

एन्फाले सागका लागि युवा टोलीको अभ्यासमा ४५ जना खेलाडी बोलाएको छ । सिनियर टोली पनि अहिले विश्वकप छनोट तथा एसियन कपको छनोट अभ्यासमा रहेकाले केही युवा खेलाडीले सिनियर टोलीसँगै अभ्यास गर्ने उनले बताए ।

घरेलु मैदानमा हुने प्रतियोगितामा सकारात्मक नतिजाको अपेक्षासहित फुटबल टोली अभ्यासमा लाग्ने प्रशिक्षक महर्जनले बताएका छन् । नेपाली युवा टोलीले १२ औं सागमा उपाधि उचालेको थियो । प्रतियोगिता आगामी मंसिर १५–२४ गतेसम्म सञ्चालन हुनेछ ।