काठमाडौं – बागमती प्रदेशलाई ८९ रनले हराउँदै प्रधानमन्त्री कप एकदिवसीय राष्ट्रिय क्रिकेट प्रतियोगितामा नेपाल एपिएफ क्लबले विजयी सुरूवात गरेको छ ।

आज कीर्तिपुरस्थित त्रिवि मैदानमा भएको खेलमा एपिएफले बागमती प्रदेशलाई ८९ रनले पराजित गरेको हो ।एपिएफले दिएको २४२ रनको लक्ष्य पछ्याएको बागमती ४२.५ ओभरमा १५२ रनमै अलआउट भयो ।

बागमतीका लागि ओपनर आशुतोष घिराइयाले ४१ रन जोड्दा अर्का ओपनर इशान पाण्डे शून्य रनमा आउट भए । कप्तान रित गौतमले ६० रन जोडे । यस्तै रविन जोशीले नटआउट २० रन जोडे ।

बलिङमा एपिएफका कप्तान रोहित पौडेलले ४ विकेट लिए । अभिनास बोहरा र मौसम ढकालले २–२ विकेट लिन सफल भए ।
त्यसअघि एपिएफले सन्दीप जोराको शतकमा ९ विकेटको क्षतिमा २४१ रन जोडेको थियो ।

टस जितेको बागमतीले फिल्डिङ रोजेपछि पहिले ब्याटिङ गरेको एपिएफको कमजोर अवस्थाबाट सन्दीपले शतक प्रहार गरेर टिमलाई बलियो अवस्थामा पुर्‍याएका थिए ।

बलिङमा बागमतीका सूर्य तामाङले ३ विकेट लिए । प्रतिश जिसी र रिजन ढकालको नाममा २-२ विकेट रहँदा सोनु देवकोटाले १ विकेट हात पारे । यसअघि बागमती हिजो पुलिससँग पराजित भएको थियो ।