मुम्बई – बलिउड अभिनेता ऋतिक रोशनको सुपरहिरो फिल्म सिरिज ‘कृष’ को चौथो भागलाई लिएर दर्शकमा लामो समयदेखि प्रतीक्षा छ । खबर त आइरहेको थियो तर फिल्म कहिले शुरु हुन्छ भन्ने पक्का भइसकेको थिएन । निर्देशक राकेश रोशनको क्यान्सरको उपचार गर्नुपर्ने भएपछि फिल्मको काममा समस्या आएको थियो ।

यतिबेला भने फिल्मको तयारी अन्तिम चरणमा पुगेको बताइएको छ ।

भारतीय मिडियालाई आधार मान्ने हो भने यो फिल्म सन् २०२० को पहिलो महिनाबाट फ्लोरमा जानेछ । यद्यपि यो फिल्म पूरा बनेर आउन अझै समय लाग्नेछ । सन् २०२० मा पनि फिल्म रिलिज हुने छैन ।

फिल्मलाई पहिले सन् २०२० को क्रिसमसको मौका पारेर रिलिज गर्ने भनिएको थियो । तर निर्माता तथा निर्देशक राकेश रोशनले फिल्मको अझै पनि स्किृप्टकै काम भइरहेको बताए ।

उनको हालै सर्जरी गरिएको थियो । उनलाई शुरुवाती समयमा घाँटीमा क्यान्सर देखिएको थियो । अहिले भने उनी रिकभर हुँदैछन् ।

फिल्म ‘कृष ४’ का बारेमा हल्ला के पनि छ भने फिल्मलाई बाहुबलीमा झैँ दुई भागमा रिलिज गरिनेछ । दुवै फिल्मलाई एकसाथ बनाइनेछ तर रिलिज भने फरक मितिमा गरिनेछ ।

यो फिल्मको पहिलो भाग ‘कोइ मिल गया’ सन् २००३ मा रिलिज भएको थियो भने सन् २००६ मा ‘कृष’ लाई फिल्मको दोस्रो भाग रिलिज गरिएको थियो । पछिल्लो सिरिज ‘कृष ३’ भने सन् २०१३ मा रिलिज भएको थियो ।