दोलखा- आलुखेती र उत्पादनको हिसाबले उर्वरभूमि मानिने दोलखाको मेलुङ गाउँपालिकाले वडा नम्बर ३ का स्थानीय किसानलाई हाते ट्याक्टर तथा उन्नत जातको आलुको बिउ वितरण गरेको छ । गाउँपालिकाले वडा नम्बर ३ का किसानलाई पालिका अध्यक्ष हिराकुमार थोकरको उपस्थितिमा कृषि सामाग्री वितरण गरेको हो ।

गाउँपालिकाले आलु प्रवर्द्धन कार्यक्रमअन्तर्गत बागमती प्रदेशको अनुदान सहयोगमा वडा नम्बर ३ को दोभान वर्षे आलु उत्पादक कृषि समुहमा आबद्ध किसानलाई ५० प्रतिशत लागत साझेदारीमा उक्त सामग्री वितरण गरेको मेलुङ गाउँपालिका कृषि प्राविधिक विष्णु जिरेलले जानकारी दिए ।

पालिकाले किसानलाई मिनिटिलर ५.५ एचपीको डिजेल इन्जिन जडहा भएको ५ थान हाते ट्याक्टर, ४ टन उन्नत जातको आलुको बिउ, विषादी छर्नको लागि स्प्रेयर १६ लिटरको १५ थान, आलुमा लाग्ने किरा नियन्त्रणको लागि जैविक ट्रप र भिटामिनलगायतका कृषि सामग्री वितरण गरेको हो ।

वडा नम्बर ३ मा आलुखेतीमा आबद्ध दोभान कृषि समूहका ३० जना किसानलाई उक्त सामग्री वितरण गरिएको हो । त्यस्तै, पालिकाले वडा नम्बर ५ का किसानलाई ५ लाख बराबरको कृषि सामग्री तथा औजार वितरण गर्न भने बाँकी रहेको प्राविधिक जिरेलले जानकारी दिए । वडा नम्बर ३ को दोभान कृषि समूहले मात्रै १० हजार टन आलु उत्पादन गर्दै आएको छ ।

आलु उत्पादनमा आत्मनिर्भर रहेको मेलुङले वार्षिक १५ करोड बराबरको आलु बिक्री गर्दै आएको पालिका अध्यक्ष हिराकुमार थोकरले जानकारी दिए । बागमती प्रदेशले चालु वर्ष वडा नम्बर ३ र ५ मा आलु प्रवर्द्धन कार्यक्रमको लागि १० लाख अनुदान दिएको थियो । वडा नम्बर ३ मा ५ लाख बराबरको कृषि सामग्री वितरण गरिए पनि वडा ५ भने वितरण गर्न बाँकी रहेको छ ।

सुवास बस्नेत