काठमाडौं- नेपाली कांग्रेसको कार्यसमिति बैठक सुरु हुनुअघि संस्थापन र संस्थापनइतर पक्षका नेताहरू आन्तरिक छलफलमा जुटेका छन् ।

सभापति शेरबहादुर देउवाले राष्ट्रियसभा निर्वाचनबारे पार्टीभित्र आन्तरिक छलफल गरेका हुन् । धुम्बाराहीमा नेता शेखर कोइराला र महामन्त्री गगन थापासँग छलफल भइरहेको कांग्रेस नेताले बताए ।

सत्ता गठबन्धनमा कांग्रेसले राष्ट्रियसभाको १० सिट पाउनुपर्ने अडान कायमै राखेको छ । यसका लागि देउवाले छलफल गरेका हुन् ।

तर, १० सिटमा औपचारिक सहमति भइसकेको छैन । कांग्रेसमा संस्थापनइतर पक्षले ४ सिटमा दाबी गरेको छ । बागमती, लुम्बिनी र गण्डकी र सुदूरपश्चिममा इतर पक्षले एक एक सिटमा दाबी गरेको हो ।

यो पटक देउवाले इतरपक्षलाई मागेको सिट दिने तयारी गरेको बुझिएको छ । यसैबीच, कांग्रेसले राष्ट्रियसभा सदस्यको उम्मेदवारी टुङ्गो लगाउन र सिटमा निर्णायक छलफल गर्न अहिले दिउँसो १ बजे पार्टी कार्यालय सानेपामा कार्यसम्पादन समितिको बैठक बोलाएको छ ।

पार्टीका प्रवक्ता मीन विश्वकर्माका अनुसार नेताहरू कार्यसम्पादन समितिको बैठकमा सानेपामा आउने क्रम जारी छ । उनले भने, ‘बैठक केही ढिला होला । सभापति ज्यू आन्तरिक छलफलमा हुनुहुन्छ ।’