इस्लामावाद- पाकिस्तानमा एक जना हिन्दू बालिकालाई अपहरण गरी जबरजस्ती धर्मपरिवर्तन गराइएको पाइएको छ । सिन्ध प्रान्तमा भएको घटनामा इन्द्र दिवान नाम गरेकी बालिकालाई इस्लाम धर्म मान्न बाध्य पारिएको हो ।

सिन्ध प्रान्तको हैदरवाद नजिकै रहेको तान्दो जाम क्षेत्रमा रहेको उनको आफ्नै घरबाट इन्द्रलाई अपहरण गरिएको र इस्लाम मान्न बाध्य पारिएको हो ।

उनलाई स्थानीय इस्लामिक उग्रवादी साजिद हुसेनले अपहरण गरेको र इस्लाम मान्न बाध्य पारेको न्युज इन्टरभेन्सनले जनाएको छ । इस्लाम धर्म मान्न बाध्य पारेपछि हुसेनले ती बालिकाको नाम ‘नइमत’ राखिदिएका थिए ।

अपहरणकर्ता हुसेनले ती बालिकाको उमेर १९ वर्ष रहेको दाबी गरेपनि विद्यालयको दस्तावेजमा भने उनको उमेर केबल १४ वर्ष रहेको जनाइएको छ ।

पाकिस्तानमा पछिल्लो समय हिन्दू, इसाई तथा अन्य धार्मिक अल्पसङ्ख्यकलाई जबरजस्ती धर्म परिवर्तन गराउने क्रम बढ्दै गएको बताइएको छ ।