धरान- प्रधानमन्त्री पुष्पकमल दाहाल प्रचण्डलाई बोलाउने प्रयास असफल भएपछि शुक्रबार धरानमा आयोजित ‘धरान डे’ उत्सवको उद्घाटन समारोहमा काठमाडौं महानगरपालिकाका मेयर बालेन्द्र शाह पुगेका छन् । धरान उपमहानगरपालिकाका मेयर हर्क साम्पाङ राईको विशेष निम्तोमा मेयर शाह अतिथिका रुपमा धरान पुगेका हुन् ।

स्वतन्त्र रुपमा निर्वाचित काठमाडौं र धरानका मेयरहरु सामाजिक सञ्जालमा निकै सक्रिय मानिन्छन् । दुबै मेयरका काम र भनाइले सामाजिक सञ्जालमा चर्चा पाउने गरेको छ ।

पब्लिक हाईस्कुलको खेलमैदानमा आयोजित उद्घाटन समारोहको मञ्चमा काठमाडौं र धरानका मेयरहरु एकैसाथ देखा परेका थिए । यसअघि उक्त कार्यक्रमको प्रमुख अतिथिका रुपमा धरानका मेयर र उपमेयरले प्रधानमन्त्री पुष्पकमल दाहाल प्रचण्डलाई निम्ता दिएका थिए ।

तर, भारतीय विदेशमन्त्री एस. जयशङ्करको नेपाल भ्रमणको समयमा ‘धरान डे’ सुरु भएकाले प्रचण्ड धरान जान नपाएको बताइएको छ । प्रधानमन्त्री धरान आउन नसक्ने भएपछि आक्रोशित हुँदै मेयर साम्पाङले आफ्नो कार्यकक्षबाट प्रधानमन्त्री प्रचण्ड र राष्ट्रपति रामचन्द्र पौडेलको तस्बिर हटाएर किराती राजा यलम्बरको तस्बिर राखेका थिए ।