काठमाडौँ– नेपाली कांग्रेसका महामन्त्री गगन कुमार थापाले राष्ट्रियसभामा संविधानले परिकल्पना गरेअनुसारको प्रतिनिधित्व हुन नसकेको बताएका छन् । बुधबार काठमाडौंमा पूर्व कर्मचारी समाज नेपालको स्मारिका बिमोचन कार्यक्रममा थापाले राष्ट्रियसभामा बिषयविज्ञहरुको प्रतिनिधित्व हुनुपर्ने परिकल्पना गरेपनि त्यसो हुन नसकेको बताएका हुन् ।

उनले राष्ट्रियसभा निर्वाचनमा उम्मेद्वार छनौट गर्ने विषयमा पार्टीहरूले सिफारिस गर्ने व्यक्तिका बारेमा संविधान अनुरूपको बहस नै नहुने अवस्था रहेको धारणा राखे । 

दलभित्रको निर्णय गर्ने थलोमै उचित प्रतिनिधित्व नहुँदा राष्ट्रियसभा सदस्य छनौटमा समस्या देखिएको उनको भनाइ छ । त्यस्तै थापाले कांग्रेसले देश संकटमा रहेको भन्न नमिल्ने बताए । थापाले कुनै क्षेत्र रहँदा नै पार्टीसँग सम्बन्ध गास्न नसके भविष्यमा समस्या पर्छ भन्ने कुरालाई भंग गर्न संरचनात्मक परिवर्तनको आवश्यकता रहेको उल्लेख गरे ।

संवैधानिक हिसाबले निरन्तर निर्वाचन सही ढंगले भइरहेको अवस्थामा मुलुक कुनै पनि हिसाबले अप्ठेरो अवस्था रहेको नदेखिएको उनले बताए ।