काठमाडौं- भारतविरुद्धको दोस्रो टेस्टको पहिलो इनिङ्ग्समा दक्षिण अफ्रिका ५५ रनमा अलआउट भएको छ । दोस्रो टेस्टमा टस जितेर पहिला ब्याटिङ गरेको दक्षिण अफ्रिकाले केवल २३.२ ओभरमा अल आउट हुदै ५५ रन मात्र बनाएको हो ।

दक्षिण अफ्रिकाका ब्याट्सम्यान कील भेरेयन्नेले सर्वाधिक १५ रन बनाए भने डेभिड बेडीङघमले १२ रन बनाउनुबाहेक अन्य ब्याटरले दोहोरो अंकमा रन बनाउन सकेनन् । दक्षिण अफ्रिकालाई ५५ रनमा अल आउट गर्ने क्रममा भारतका बलर मोहमद सिराजले सर्वाधिक ६ विकेट लिएका थिए भने जसप्रित बमराह र मुकेश कुमारले समान २ विकेट लिएका थिए ।

टेस्ट क्रिकेटमा दक्षिण अफ्रिकाले एक इनिङ्ग्समा बनाएको आठौँ सबैभन्दा कम योगफल हो । टेस्ट क्रिकेटको इतिहासमा दक्षिण अफ्रिका दुई पटक सबैभन्दा कम ३०–३० रनमा अलआउट भएको रेकर्ड छ । दुवै पटक नै इङ्ल्याण्डसँग दक्षिण अफ्रिका ३० रनमा अल आउट भएको थियो ।

२ खेलको जारी टेस्ट सिरिजमा दक्षिण अफ्रिका १–० ले अगाडि रहेको छ । पहिलो टेस्टमा दक्षिण अफ्रिकाले भारतलाई एक इनिङ्ग्स र ३२ रनले पराजित गरेको थियो ।