काठमाडौं – अखिल नेपाल फुटबल संघ एन्फाले असार दोस्रा साता भएको ‘चिया काण्ड’मा फिटनेश ट्रेनर विवेक विक्रान्त अधिकारीलाई कारबाही गरेको छ ।

राष्ट्रिय फुटबल टोलीका गोलकिपर किरण चेमजोङ र अधिकारीबीच भएको विवादलाई लिएर एन्फाले कारबाही गरेको हो । मंगलबार बसेको एन्फाको आकस्मिक बैठकले अधिकारीलाई तत्कालका लागि जिम्मेवारीबाट हटाउने निर्णय गरेको हो ।

अधिकारीलाई कारबाही गर्दा एन्फाले खेलाडीलाई भने रक्षा दिएको छ । किरणसँगको सामान्य विवादमै अधिकारीले उनको मुखमा चिया उछालेपछि विवाद शुरु भएको थियो ।

विश्‍वकप छनोट प्रतियोगिता तयारीका लागि असार ८ बाट अभ्यास थालेको राष्ट्रिय फुटबल टोलीका फिटनेस ट्रेनर अधिकारी र टोलीका उपकप्तान एवं गोलकिपर किरण चेमजोङबीच विवाद भएपछि अधिकारीले चेम्जोङको मुखमा चिया छ्यापिदिएका थिए ।

घटनापछि किरण सहितका राष्ट्रिय टिमका खेलाडीले एन्फामा निवेदन दिँदै विवेकलाई कारबाही गर्न माग गरेको थिए । सोही अनुसार एन्फाले विवेकलाई तत्काल फुटबल टिमको जिम्मेवारीमा नरहने गरि बाहिर राखेको थियो ।

घटनाको बिषयमा छानविन गर्न कार्यसमिति सदस्य मधुसुदन उपाध्यायको संयोजकत्वमा छानविन समिति गठन गरेको थियो ।