काठमाडौं– महानगरीय ट्राफिक प्रहरी महाशाखाले आर्थिक वर्ष ०७५/०७६ मा सवारीसाधनबाट ३१ करोड राजस्व संकलन गरेको छ ।

मादक पदार्थ पिएर सवारी चलाउने, लेन अनुशासन पालना नगर्ने, बढी भाडा असुल्ने, जथाभावी सवारी पार्किङ गर्ने तथा ट्राफिक नियमको उल्लङघन गर्ने सवारी चालकलाई कारवाही गर्दा ३१ करोड राजश्व संकलन भएको हो ।

कारवाहीसँगै महाशाखाले ट्राफिक सचेतना कक्षामा बोलाइ चेतनामूलक कुराहरु सिकाउने र पटकपटक नियम उल्ङघन गर्नेलाई थप जरिवाना समेत लिइरहेको छ ।

सडकमा ट्राफिक नियम उल्ङघन गर्नेको संख्या दिनप्रतिदिन बढ्दै गइरहेको छ भने राजस्व संकलन पनि बढिरहेको छ ।

राजस्व संकलनको तथ्याङ्क हेर्ने हो भने आर्थिक वर्ष २०७५/२०७६ सालमा ३१ करोड ५६ लाख २७ हजार ५ सय रुपैयाँको राजस्व संकलन भएको छ ।

आर्थिक वर्ष ०७४/०७५ मा २९ करोड ३१ लाख ४५ हजार रुपैयाँ राजस्व संकलन भएको थियो । त्यस्तै ०७३÷०७४ मा ३५ करोड ६० लाख ६७ हजार रुपैयाँ राजस्व संकलन भएको थियो । आर्थिक वर्ष ०७२÷७३ मा १५ करोड ८२ लाख ९१ हजार रुपैयाँ राजस्व संकलन गरिएको थियो ।