काठमाडौं –अर्जेन्टिना तथा युभेन्टसका युवा खेलाडी पाउलो डिबाललाई इंग्लिस प्रिमियर लिग क्लब म्यान्चेस्टर युनाइटेडले आफ्नो क्लबमा आवद्ध गर्ने योजना बनाएको छ ।

उनलाई ओल्ड ट्रार्फोडमा स्वागत गर्न युनाइटेड अहिले छलफलमा जुटिसकेको छ । यद्यपी युभेन्ट्स डिबालाको स्थानमा युनाइटेडका फरवार्ड रोमेलु लुकाकुलाई आफ्नो क्लबमा आवद्ध गर्ने योजनामा रहेको जनाइएको छ ।

२५ बर्षीय युवा खेलाडी डिबालाले गएको सिजनमा युभेन्ट्सबाट १० गोल गरेका छन् । युनाइटेडका प्रशिक्षक ओले गनर सोल्सायरले नयाँ सिजनको शुरुवात अगाडि नै क्लबमा खेलाडी आवद्ध गर्ने बताइसकेका छन् । तर, उनले डिबालाबारे भने खुलेर बताएनन् । उनले भने,‘म यहाँ कुनै हल्ला र अर्को टिमको खेलाडीको बारेमा बोल्दिन । हामी एक वा दुई अवस्थामा खेलाडी ल्याउने गरि काम गरिरहेका छौं । अबको १० दिन भित्र हामी एक वा दुई फ्रेस खेलाडीबारे परिचय गराउने छौं ।’

इटालीयन क्लब युभेन्ट्समा क्रिष्टियानो रोनाल्डो गएपछि डिबालाले कम अवसर पाउने गरेका छन् ।