काठमाडौं- अस्ट्रेलियाले पाकिस्तानविरुद्धको जारी टेस्ट सिरिजमा लगातार दोस्रो जित हासिल गरेको छ ।

मेलवर्नमा सम्पन्न खेलको चौथो दिन ३ सय १७ रनको लक्ष्य पछ्याएको पाकिस्तान २ सय ३७ रनमा अल आउट भएपछि अस्ट्रेलिया ७९ रनले विजयी भएको हो ।

पाकिस्तानका लागि कप्तान शान मसूदले सर्वाधिक ६० रन बनाए भने अगा सलमानले ५० र बाबर आजमले ४१ रनको योगदान दिएका थिए ।

पाकिस्तानलाई पराजित गर्ने क्रममा अस्ट्रेलियाका कप्तान पाट कमिन्सले ५ विकेट लिएका । कमिन्सले यस टेस्टको दुवै इनिंगमा ५-५ विकेट लिएका छन् ।

यसअघि अस्ट्रेलियाले पहिला ब्याटिङ गर्दै ३ सय १८ रन बनाएको थियो भने पाकिस्तानले २ सय ६४ रन बनाएको थियो । त्यसपछि अस्ट्रेलियाले दोस्रो इनिङ्ग्समा २ सय ६२ रन बनाएर पाकिस्तानलाई ३१७ रनको लक्ष्य दिएको थियो ।

योसँगै अस्ट्रेलिया ३ खेलको सिरिजमा २-० ले अगाडी रहेको छ र सिरिज पनि एक खेल अघि नै जितेको छ । अब सिरिजको अन्तिम खेल जनवरी ३ देखि सिड्नीमा हुनेछ ।