रेक्याभिक- भारतको अन्तरिक्ष अनुसन्धान संगठन इसरोले यस वर्ष लेइफ एरिक्सन चन्द्र पुरस्कार प्राप्त गरेको छ ।

आइसल्याण्डको राजधानी रेक्याभिकमा रहेको हुसाभिक संग्रहालयले यस पुरस्कार प्रदान गर्दै आएको छ । भारतीय चन्द्र अभियान चन्द्रयान ३ को सफलताका लागि इसरोले यस पुरस्कार पाएको भारतीय समाचार संस्था एएनआईले जनाएको छ ।

चन्द्रयान ३ मार्फत् चन्द्र अभियानमा इसरोको लगाव र आकाशीय पिण्डको वैज्ञानिक खोजका लागि इसरोलाई यस पुरस्कार प्रदान गरिएको हो । इसरोका तर्फबाट आइसल्याण्डका लागि भारतीय राजदूत बालासुब्रमण्ह्यम श्याले यस पुरस्कार ग्रहण गरेका थिए ।

यस वर्षको अगस्ट २३ का दिन भारतीय चन्द्र अभियान चन्द्रयान ३ ले चन्द्रमाको दक्षिणी ध्रुवमा अवतरण गरी ऐतिहासिक कोशेढुङ्गा पार गरेको थियो । यससँगै अमेरिका, चीन र रुसपछि भारत चन्द्रमामा सफलतापूर्वक यान अवतरण गर्ने चौथो मुलुक बन्न सफल भएको थियो ।