बेइजिङ- ताइवानलाई हतियार आपूर्ति गरेको भन्दै चीनले अमेरिकी रक्षा उपकरण निर्माता कम्पनी लकहिडमाथि प्रतिबन्ध लगाउने चेतावनी दिएको छ ।

अमेरिकाले गत डिसेम्बर १६ मा ताइवानलाई ३० करोड अमेरिकी डलर बराबरको रक्षा उपकरण प्रदान गर्ने सम्झौता स्वीकृत गरेसँगै चीनले यस्तो चेतावनी दिएको हो ।

नयाँ हतियारबाट ताइवानको कमाण्ड, कन्ट्रोल, कम्युनिकेसन र कम्युटर (सी४) क्षमतामा सुधार आउने अपेक्षा गरिएको छ । जो बाइडेनले सन् २०२१ मा राष्ट्रपतिको पद सम्हालेयता अमेरिकाले ताइवानसँग १२ औँ पटक हतियार सम्झौता गरेको हो ।

चीनले सन् २०२० देखि नै लकहिडमाथि प्रतिबन्ध लगाउने चेतावनी दिँदै आएको छ । चीनले लकहिडलाई ‘अविश्वसनीय कम्पनीको सूची’ मा राखिसकेको छ । त्यसबाहेक चीनले यस कम्पनीका कार्यकारीहरुलाई आफ्नो मुलुकको भ्रमणमा पनि प्रतिबन्ध लगाएको छ ।