काठमाडौं- नेकपा एमालेका अध्यक्ष केपी शर्मा ओलीले बसाइसराइका कारण मध्यपहाडका गाउँमा युवाको कमी रहेको बताएका छन् ।

एमालेले झुलाघाट–चिवाभन्ज्याङ यात्राबारे जानकारी आयोजना गरेको पत्रकार सम्मेलनमा उनले यात्रामा केबल ४० प्रतिशतमात्रै युवाहरु आएको भन्दै गाउँमा युवाको कमी रहेको जिकिर गरेका हुन् ।

उनले भने, ‘मध्यपहाडमा सबैभन्दा ठूलो कुरा बसाइसराइ रहेछ । गाउँमा युवा रहेनछ्न् । ४० प्रतिशत मात्र युवा कार्यक्रममा आए ।’

सम्मेलनमा ओलीले मध्यपहाडमा अझै विकास पुग्न नसकेको पनि बताए । विकास नपुग्नु नै मध्यपहाडका लागि ठूला चुनौती रहेको उनको भनाइ छ । उनले भने, ‘एक हिसाबले हाम्रो यात्रा संस्कृतिक पनि भयो । स्थानीय उत्पादनकै खाना खायौँ । देश सम्पन्न छ । ठूलो चुनौती भनेको विकास नपुगेको रहेछ ।’

उनले मध्यपहाडमा आधुनिकीकरण र व्यावसायीकरणको पनि समस्या रहेको उल्लेख गरे ।