काठमाडौँ– प्रधानमन्त्री कप महिला टि–२० राष्ट्रिय क्रिकेट प्रतियोगितामा कोशी प्रदेशले लगातार दोस्रो जित निकालेको छ ।

कीर्तिपुरस्थित त्रिवि क्रिकेट मैदानमा भएको खेलमा कोशीले बागमती प्रदेशलाई ८ विकेटले पराजित गरेको हो ।

बागमतीले जितका लागि दिएको ८८ रनको मध्यम लक्ष्य कोशी प्रदेशले १८ ओभर १ बलमा दुई विकेट गुमाउँदै पूरा गर्‍यो । कोशीको जितमा काजल श्रेष्ठ र अपसरी बेगमले समान ४१ रनको योगदान दिए ।

बागमतीकी संस्कृति फुयाँल र सोनी पाख्रिनले समान एक–एक विकेट लिए ।

त्यसअघि  टस हारेर पहिले ब्याटिङको निम्तो पाएको बागमतीले निर्धारित २० ओभरमा आठ विकेट गुमाउँदै ८७ रन बनाएको थियो ।

बागमतीका लागि यशोधा विष्टले सर्वाधिक ४१ रनको योगदान दिइन् । त्यस्तै अस्मीना कमाचार्यले २४ रन बनाइन् । अन्य खेलाडीले दोहोरो अङ्क जोड्न सकेनन् ।

कोशी प्रदेशकी अपसरी बेगम र सबनम राईले समान दुई–दुई तथा सङ्गीता राईले एक विकेट लिइन् ।

हिजो भएको पहिलो खेलमा कोशीले कर्णाली प्रदेशलाई १० विकेटले हराएको थियो । यता बागमतीको भने यो पहिलो हार हो । हिजो भएको खेलमा बागमतीले मधेस प्रदेशलाई पराजित गरेको थियो ।