काठमाडौं – माधवकमुमार नेपाल नेतृत्वको नेकपा एकीकृत समाजवादीले राष्ट्रियसभाका लागि तीनजना नेताको नाम अगाडि सारेको छ । माघ ११ मा हुने निर्वाचनमा समाजवादीको भागमा गडठबन्धनका तर्फबाट ३ सीट पर्ने पक्का छ ।

एकीकृत समाजवादीले उपाध्यक्षद्वय प्रवेश हमाल, घनेन्द्र बस्नेत तथा उपमहासचिव गंगाधर तुलाधरलाई राष्ट्रियसभाको उम्मदेवार बनाउने भएको छ । एकीकृत समाजवादी स्रोतका अनुसार ‘पार्टीभित्र कुनै नाटकीय परिवर्तन नभए’ यी नामहरू नै फाइनल हुन् ।

एकीकृत समाजवादीका एक नेताका अनुसार अध्यक्ष नेपाल, महासचिव घनश्याम भुसाल र सम्मानित नेता झलनाथ खनालवीच पात्रका बारेमा टुंगो लागेको हो । तर, यसलाई औपचारिकता दिन भने बाँकी छ ।

एकीकृत समाजवादीका नेता झलनाथ खनालले भने पात्र र सीट संख्याको बारेमा टुंगो नलागेको बताए । उनले भने, ‘अहिले त्यतातिर ध्यान नै दिएको छैन । बैठकमा पार्टी विधानका बारेमा व्यापक छलफल भइरहेको छ । शुक्रबार पनि बैठक छ ।’

हाल राष्ट्रियसभामा एकीकृत समाजवादी ८ सांसद छन् । यीमध्ये फागुन २१ देखि तीन सीट खाली हुँदैछन् । गठबन्धनले तीनै सीट एकीकृतलाई दिए उसको स्थान सुरक्षित राख्ने तयारी छ ।

नेकपा एकीकृत समाजवादीबाट सिंहबहादुर विश्वकर्मा, नन्दा चपाइको पदावधि सकिँदै छ । यस्तै पदावधि सकिन लागेका स्वतन्त्र सांसद खिमलाल देवकोटा पनि समाजवादीबाटै जितेका थिए ।

राष्ट्रियसभा २० जना सांसदहरुको पदावधि फागुन २१ मा सकिँदै छ । राष्ट्रियसभामा पदावधि सकिने एमालेका ९ जना छन् भने गठबन्धनतर्फ नेपाली कांग्रेसका ४, नेकपा माओवादी केन्द्रका ३, नेकपा एकीकृत समाजवादीका ३ र जसपाका एक जना सांसद छन् ।