पोखरा- पर्यटकीय नगरी पोखरामा अङ्ग्रेजी नयाँ वर्षको अवसरमा सडक महोत्सव २०२३–२०२४ आयोजना हुने भएको छ ।

पोखराको लेक साइड क्षेत्रमा रेष्टुरेण्ट एण्ड बार एशोसियसन रेवानले बिहीबार चितवनमा पत्रकार सम्मेलन गर्दै २५ औँ पोखरा सडक महोत्सवको तयारी भइरहेको महोत्सवका संयोजक विश्वराज पौडेलेले जानकारी दिए । उक्त अवसरमा आन्तरिक तथा वाह्य पर्यटकलाई अङ्ग्रेजी नयाँ वर्षको गन्तव्यस्थलको रुपमा प्रवर्द्धन गर्न यही पुष १२ देखि १६ गते सम्म पोखराको लेक साइडको करिब ३ किलोमिटर सम्म महोत्सव हुँदैछ ।

सडकमा नै खाऔँ, सडकमा नै रमाऔँ भन्ने नाराका साथ आयोजना हुने महोत्सवको मुख्य आकर्षण विभिन्न जातजातीको सास्कृतिक कार्यक्रम मौलिक भेषभुषा प्रदर्शनका साथै विभिन्न प्रदर्शनी गरिने उनले बताए ।

महोत्सवमा बालबालिकाहरुका लागि चित्रकला र पोखराको विभिन्न साहासिक खेलकुदहरुको डकुमेन्ट्री प्रदर्शनका साथै पोखराका विभिन्न पर्यटकीय गन्तव्यहरु प्रवर्द्धन गर्ने कार्यक्रम रहेको संयोजक पौडेलले बताए । नेपालमा नै फरक महोत्सवको रुपमा रहेको पोखरा सडक महोत्सवमा ५ लाख पर्यटक भित्राउने लक्ष्य रहेको छ ।