काठमाडौं– नेपाली कांग्रेसको पाल्पा जिल्ला सम्मलेनका क्रममा तानसेन नगरपालिकाको ब्यानर छोपिएकोमा महामन्त्री गगन थापाले सार्वजनिक रुपमा माफी मागेका छन् ।

कांग्रेसले नगरपालिकाको ब्यानर छोपेर पार्टीको ब्यानर राखेको र सार्वजनिक सम्पत्तिलाई पार्टीको काममा दुरुपयोग गरेको भन्दै आलोचना भएपछि थापाले माफी मागेका हुन् ।

‘पाल्पा जिल्ला सम्मेलनका क्रममा भएको लापरवाहीप्रति क्षमा चाहन्छु’ महामन्त्री थापाले भनेका छन् ।

जिल्ला सम्मेलनमा भएको घटनाबारे स्पष्टीकरण दिँदै महामन्त्री थापाले भने, ‘सम्मेलनका लागि नगरपालिकाको तल्लो तलामा रहेको हल भाडामा लिएर त्यसमा नै मूल ब्यानर टाँगेर कार्यक्रम सुरु भएको थियो तर हल बाहिर रहनुभएका साथीहरूले पनि मेरो कुरा सुन्न पाउनु पर्‍यो भनेर माग गरेपछि, मन्तव्यको लागि आयोजकले भवनको माथिल्लो तलाको बार्दलीमा लैजानुभयो ।’

थापाले अगाडि भनेका छन्, ‘त्यसका लागि नगरपालिकाको ब्यानर छोप्नु र सम्मेलनको ब्यानर राख्नु गम्भीर लापरवाही हो। यसबारे जानकारी नराख्नु र ध्यान नपुग्नु मेरो गल्ती हो। त्यसप्रति म माफी चाहान्छु।’

थापाले सामाजिक सञ्जालमार्फत माफी माग्दै भनेका छन्, ‘पार्टीका निम्ति यो एउटा सिकाइ भएको छ, आगामी दिनमा यस्ता विषयमा थप सचेत रहनेछौं।’