महोत्तरी – प्रधानमन्त्री पुष्पकमल दाहालले सरकारका राम्रा कामबाट प्रतिक्रियावादीहरु आतङ्कित भई जनतामा गलत भ्रम छर्न थालेको बताएका छन् ।

आज महोत्तरीको बर्दिवासमा आयोजित एक कार्यक्रममा बोल्दै प्रधानमन्त्री दाहालले सरकारले देशव्यापी रुपमा थालेको सामाजिक न्याय, सुशासन र समृद्धिका पक्षमा भएका कामबाट एक थरी मान्छे आतङ्कित बनेको बताए ।

गठबन्धन र मन्त्रिपरिषद्को बैठकबाट एनसेलसम्बन्धी छानबिन गर्न समिति बनाएपछि प्रतिक्रियावादीले जानीबुझी सरकारका कामको कुप्रचार गर्ने षड्यन्त्र रचेको प्रधानमन्त्री दाहालको तर्क थियो ।

माओवादी केन्द्रको नेतृत्वको सरकारले थालेका कामबाट देशमा सकारात्मक परिवर्तन सुरु भएको देख्न नसकेको उनको आरोप थियो ।

भारत, चीन, अमेरिका भ्रमण र संयुक्त राष्ट्रसंघ, इटालीको खाद्य सम्मेलन, कोप-२८ लगायतका सभा र सम्मेलनमा आफ्नो सहभागिताले नेपालको उपस्थितिमात्रै नभएर विश्वसामु नेपाल र नेपाली जनताको पक्षमा नयाँ आयाम थपेको प्रधानमन्त्री दाहालले बताए ।

लगातार प्रयासपछि देशको अर्थतन्त्रमा केही प्रगति भए तापनि नयाँ वर्षबाट नयाँ प्रक्रियाबाट नेपालको अर्थतन्त्रलाई गति दिने गरी काम गर्ने प्रधानमन्त्रीको दबी छ ।

नेपालमा शिक्षामा गुणात्मक रुपान्तरण गर्नु देशको अहिलेको महत्वपूर्ण कार्यभार भएको भन्दै उनले शिक्षा विधेयक छिट्टै मन्त्रिपरिषद्बाट पारित गराएर कार्यान्वयनमा ल्याउने प्रतिबद्धता जनाए ।