काठमाडौं- पाकिस्तानी सेनाको विमान राउलपिण्डी नजिकैको एक आवास क्षेत्रमा दुर्घटना हुँदा १७ जनाको मृत्यु भएको छ । दुर्घटनामा १२ नागरिक तथा ५ जना विमानमा सवार चालक दलका व्यक्तिको मृत्यु भएको हो ।

दुर्घटनामा १२ जना घाइते भएका छन् । दुर्घटनामा परेपछि त्यसमा आगो लागेको र केही घरहरूमा पनि आगो फैलिएको थियो। राजधानी इस्लामाबादनजिकै रहेको रावलपिन्डीमा पाकिस्तानी सेनाको मुख्यालय छ।

सो विमान तालिमका लागि उडाइएको थियो। दुर्घटनाको कारण खुलेको छैन । एएफपीका एक संवाददाताका अनुसार त्यहाँबाट पछिसम्म धुँवा उडिरहेको थियो र नजिकै रहेको घरको छतमा विमानको अवशेष देखिएको बीबीसीले उल्लेख गरेको छ ।

सन् २०१० मा एउटा निजी विमान कम्पनीले सञ्चालन गरेको विमान इस्लामाबादनजिकै दुर्घटनाग्रस्त हुँदा १५२ जनाको मृत्यु भएको थियो। त्यो नै पाकिस्तानमा भएको सबैभन्दा डरलाग्दो विमान दुर्घटना थियो।