काठमाडौं–सरकारले समाजकल्याण परिषदका सबै पदाधिकारी बखास्त गरेको छ । कोषमा अनियमितता भएको भन्दै उपाध्यक्ष नीलमणि बराल, कोषध्यक्ष वीरबहादुर ठगुन्ना, सदस्य सचिव डिल्लीप्रसाद भट्ट, तथा सदस्यहरु इन्द्रकुमार झा र गोकर्णप्रसाद भट्टराई बर्खास्त गरेको राजधानी दैनिकमा खबर छ ।

भ्रष्टाचार मुद्दामा ‘ठूला माछा’ उम्केका उम्क्यै शीर्षकमा प्रकाशित समाचारमा घुस प्रकरणमा मुछिएका अख्तियार दुरुपयोग अनुसन्धान आयोगका आयुक्त राजनारायण पाठकले राजीनामा दिएपछि उनी कानुनी कारबाहीबाट उम्कने हो कि भन्ने आशंका बढेको छ । विगतमा ‘ठूला माछा’ सजिलै उम्किएको अवस्थामा घुस लिएको आरोपपछि राजीनामा दिएका पाठकविरुद्ध कारबाही प्रक्रिया कसरी अघि बढ्छ भन्ने चर्चा सर्वत्र छ ।

त्यस्तै यो वर्ष पनि विद्यालयमा पाठ्यपुस्तक अभाव हुने संकेत देखिएको छ । अझै ४० लाख थान छापिनै बाँकी, पाँच सय विपन्न बालबालिकालाई एक अर्बको अक्षयकोषलगायतका समाचार मुख्य पृष्ठमा छापिएका छन् ।