काठमाडौँ– नेपाली कांग्रेसको महासमिति बैठक सर्न सक्ने नेताहरूले बताएका छन् । महासमिति बैठक पुस १६ देखि १९ सम्म ललितपुरको गोदावरी हलमा हुने तय छ ।

तर जाडो बढेको भन्दै सभापति देउवाले बैठक सार्न दबाब दिएको बुझिएको छ । यही विषयको छिनोफानो गर्न कांग्रेसले आगामी शुक्रबार केन्द्रीय कार्यसम्पादन समितिको बैठक बोलाएको छ ।

कांग्रेसका एक नेताका अनुसार संस्थापन पक्षका केही नेताहरू बाहेक अन्य नेताहरूले यो पटक बैठक नसार्न अडान लिइरहेका छन् ।

यता, कांग्रेस केन्द्रीय कार्यलयका मुख्यसचिव कृष्णप्रसाद पौडेलका अनुसार निर्धारित समयमा नै बैठक हुनेछ । उनका अनुसार पुस १६ देखि १९ सम्म नै महासमितिको बैठक हुनेछ । पौडेलले खबरहबलाई भने, ‘यो पटक बैठक सर्दैन । बाहिर आएका कुराहरू भ्रम मात्र हुन् ।’

देउवाले आफू मातहतमा रहेका नेताहरूलाई बैठक सार्नका लागि दबाब दिन सर्कुलर जारी गरेको नेताहरूको भनाइ छ । हुन त यसअघि मंसिर २३ देखि २५ सम्म बैठक बस्ने समय निर्धारण भएको थियो । तर विभिन्न कारण देखाएर कांग्रेसले महासमिति बैठक सारेको थियो ।

यता, आज संस्थापन इतर (शेखर–गगन) समूहको बैठक बसिरहेको छ ।