काठमाडौं- नेपाली कांग्रेसका महामन्त्री गगन थापाले कांग्रेस सुशासनको वाचा मात्रै गर्ने नभएर सुशासनकै निम्ति जन्मिएको पार्टी भएको बताएका छन् ।

आज कांग्रेस मुखपत्र नेपाल पुकारको लोकार्पण समारोहमा बोल्दै उनले कुशासनबाट नागरिक वाक्क भएको तर्क गरे ।

कार्यक्रममा बोल्दै उनले भने, ‘हामी सरकारमा भएको बेला, हाम्रो नियन्त्रणमा राजनीति भएको बेलामा, हामी सबैभन्दा प्रभावशाली भएको बेलामा, हामीले भनेको बाटोमा देश हिँडिरहेको बेलामा कुशासनका यति धेरै घटना किन भइरहेको छन् ? यति धेरै काण्ड किन भइरहेको छन् ? जरामा के छ ? समस्या कहाँ छ ?’

एउटा प्रकरण सेलाउन नपाउँदै अर्को अनियमितताको प्रकरण आउनु नागरिक र देशका लागि दुःखद् भएको महामन्त्री थापाको तर्क छ ।