कास्की – राष्ट्रिय खेलाडीको वर्चस्व रहेको त्रिभुवन आर्मी क्लबलाई हराउँदै मधेश प्रदेशले केपी ओली कप टि२० प्रतियोगिताको उपाधि जितेको छ । पोखरा रङ्गशालामा भएको खेलमा मधेशले आर्मीलाई ११ रनले हराएको हो ।

जितको लागि १ सय ३६ रनको विजयी लक्ष्य पछ्याएको आर्मीले २० ओभरमा ७ विकेट गुमाउँदै १ सय २४ रन मात्र बनाउन सक्यो । आर्मीका कप्तान विनोद भण्डारीले ३२ रन बनाउँदा विवेक यादव २५ र सोमपाल कामी १६ रनमा अविजित रहे । अन्य खेलाडीले राम्रो ब्याटिङ गर्न सकेनन् ।

मधेशका हरिशंकर शाहले ४ विकेट लिए । प्रदीप पासवानले २ विकेट लिँदा प्रतिक यादवले १ विकेट लिए ।

यसअघि पहिला ब्याटिङ गरेको मधेशका लागि विशाल पटेलले नटआउट रहँदै ४९ रन बनाए । हरिशंकर शाहले २७ रन बनाउँदा हिमांशु दुक्तले १४ रन बनाए ।

आर्मीका विवेक यादव र सहब आलमले समान ३–३ विकेट लिए । सोमपाल कामी र बसिर अहमदले पनि समान १-१ विकेट लिए ।