काठमाडौं- सांसदहरुले राष्ट्रिय गौरवका आयोजना सुरक्षाको जिम्मेवारी सशस्त्र प्रहरीलाई दिनुपर्ने प्रस्ताव गरेका छन् ।

सिंहदरवारमा बसेको संसदको राज्यव्यवस्था समितिको बैठकमा सांसदहरुले सो प्रस्ताव राखेका हुन् । समितिका सदस्य एवं पूर्वगृहमन्त्री जनार्दन शर्माले राष्ट्रिय गौरवका आयोजना सुरक्षा सशस्त्र प्रहरीलाई दिनुपर्ने बताए ।

उनले नेपाल प्रहरीको संख्या कम रहेकाले यो विकल्पमा जान सकिने सुझाव दिए । सुरक्षाका अवस्था मूल्यांकन गरेर प्रहरी परिचालन गर्नुपर्ने उनको तर्क थियो ।

राज्य व्यवस्था तथा सुशासन समितिको बैठकमा ‘नेपाल प्रहरी र प्रदेश प्रहरीले सम्पादन गर्ने कार्यको संचालन, सुपरीवेक्षण र समन्वय सम्बन्धमा व्यवस्था गर्न बनेको विधेयक’ माथिको छलफल जारी छ ।

समितिका अर्का सदस्य दिलेन्द्रप्रसाद बडुले आवश्यताको आधारमा सुरक्षा निकायको परिचालन गर्नुपर्ने बताए । बैठकमा समितिका सदस्यहरुले नेपाल प्रहरीको परिचालन अपराध अनुसन्धानमा केन्द्रीत हुनुपर्ने धारणा पनि राखेका थिए ।