काठमाडौं– रामेछापको मन्थली नगरपालिका वडा नम्बर ३ मा अनौठो भ्रष्टाचार काण्ड भएको छ । स्थानीय एक महिलाले विधवा भत्ता खानका लागि वडासचिवसँग मिलेमतो गरेर आफ्ना जीवित पतिलाई मरेको भनी कागजात बनाएको पाइएको छ ।

स्थानीय निर्मला खत्रीले मन्थली नगरपालिका वडा नम्बर ३ का वडाध्यक्ष शिवकुमार महतोसँग मिलेमतो गरी आफ्नो जीवित पतिको मृत्यु दर्ता गराइन् । त्यसपछि उनले स्थानीय तहबाट मासिक रुपमा एकल महिला भत्ता थाप्न थालिन् । निर्मलाले अहिलेसम्म ४५ हजार रुपैयाँ भत्ता पचाइसकेकी छिन् ।

निर्मलाको सामाजिक सुरक्षा भत्ता परिचय पत्र बनाउन श्रीमानको मृत्युदर्ता सम्बन्धी विवरण भरेर वडा सचिव महतोले फर्जी लिखत तयार पारिदिएका थिए ।

यसैबीच, अख्तियार दुरुपयोग अनुसन्धान आयोगले शुक्रबार वडा सचिव शिवकुमार महतो र निर्मला खत्रीविरुद्ध विशेष अदालतमा भ्रष्टाचार मुद्दा दायर गरेको छ ।

तत्कालीन वडा सचिव महतोले निर्मला खत्रीसँगको मिलेमतोमा निर्मला खत्रीको जिवित श्रीमानको मृत्यु भएको भनी भ्रष्टाचार गरेको अख्तियारको दाबी छ ।

दुबै कसुरदारबाट ४५ हजार २ सय २० रुपैयाँ बराबरको बिगो असुलउपर गरी कारवाही गर्न अभियोगपत्रमा मागदाबी गरिएको अख्तियारका प्रवक्ता भोला दाहालले विज्ञप्तिमार्फत बताएका छन् ।

हेर्नुहोस् अख्तियारको विज्ञप्ति–