कोलम्बो- श्रीलङ्कामा अर्को वर्ष राष्ट्रपतीय र संसदीय निर्वाचन हुने भएको छ । राष्ट्रपति रनिल विक्रमासिङ्घेले सन् २०२४ मा चुनाव गर्नेबारे  संसदलाई निर्वाचनबारे जानकारी दिएका हुन् ।

श्रीलङ्काली क्रिकेटमा देखा परेको सङ्कटसहित अन्य विषयबारे संसदमा सम्बोधन गर्दै राष्ट्रपति विक्रमासिङ्घले यसबारे जानकारी दिएका हुन् ।

आफूले निर्वाचन स्थगन गर्न लागेको भन्ने आरोपलाई उनले अस्वीकार गरे । सरकारले सन् २०२५ मा प्रान्तीय परिषद् र स्थानीय सरकारको निर्वाचन गराउने उनको भनाइ छ ।

सरकारले निर्वाचन गराउनका लागि पर्याप्त बजेट नभएको घोषणा गरेपछि निर्वाचन आयोगले यसै वर्षको सुरुमा स्थानीय सरकारको निर्वाचनहरू अनिश्चितकालका लागि स्थगन गरेको छ ।

वृक्षरोपण, उद्यम सुधार तथा अर्थराज्यमन्त्री रञ्जीत सियाम्बलपतियाले भविष्यमा सम्भावित निर्वाचनहरूका लागि १० अर्ब रुपैयाँ (तीन करोड पाँच लाख अमेरिकी डलर) को बजेट विनियोजन गरिएको घोषणा गरे ।