इस्लामावाद- संयुक्त राष्ट्रसंघले विदेशी महिला तथा बालबालिकाको संरक्षण गर्न पाकिस्तानसँग आग्रह गरेको छ ।

पाकिस्तानले आफ्नो मुलुकमा रहेका विदेशी नागरिकलाई देश निकाला गर्न थालेपछि राष्ट्रसंघीय शरणार्थी निकाय यूएनएचसीआर, राष्ट्रसंघीय आप्रवासन निकाय आईओएम र राष्ट्रसंघीय बालकोष युनिसेफले पाकिस्तानलाई आफ्नो देशमा रहेका विदेशी महिला र बालबालिकाको रक्षा गर्न अपिल गरेका हुन् ।

पाकिस्तानले अवैध रुपमा रहेका विदेशी खासगरी अफगान नागरिकलाई देश निकाला गर्न थालेपछि राष्ट्रसंघीय निकायहरुले यस्तो अपिल गरेका हुन् । ती निकायहरुले पाकिस्तानबाट अफगानिस्तान जाने क्रममा महिला र बालबालिकालाई थप जोखिम हुने भन्दै यस्तो आग्रह गरेका हुन् ।

भारतीय अखबार द हिन्दुको अनलाइन संस्करणले जनाएअनुसार ती निकायहरुले पाकिस्तानमा रहेका शरणार्थीहरु, महिला बालबालिकाहरुको रक्षाका लागि पाकिस्तानलाई सहयोग गर्न अन्तर्राष्ट्रिय समुदायलाई पनि आह्वान गरेका छन् ।