काठमाडौँ- काठमाडौंको गोठाटारमा प्रहरीले गोली प्रहार गरी दुई जनालाई लागू औषधसहित नियन्त्रणमा लिएको छ ।

पक्राउ पर्नेमा एक जना भारतीय र एक नेपाली रहेका छन् । उनीहरूको साथबाट २ सय ग्राम ब्राउन सुगर, एउटा पेस्तोल र तीन राउण्ड गोलीका साथै डिजीटल तराजु र नगद ५० हजार रुपैयाँ समेत बरामद गरिएको प्रहरीले जनाएको छ ।

प्रहरीले चलाएको गोली लागेर भारतको पश्चिम बंगाल राज्यको नक्सलबारीका ४८ वर्षीय मोहमद करिम घाइते भएका छन् । उनको दाहिने गोडामा गोली लागेको छ । उनलाई उपचारका लागि मदरल्याण्ड अस्पताल, पेप्सिकोला लगिएको छ ।

घटनामा झापाको कचनकवल ८ का ३७ वर्षीय हर्कबहादुर लिम्बु पनि पक्राउ परेका छन् । पक्राउ परेका लिम्बु २०७४ चैत २९ गते मानव बेचबिखन मुद्दामा कारवाही भई ५ वर्ष जेल भुक्तान गरी छुटेको प्रहरीको भनाइ छ ।