नयाँ दिल्ली – भारतको प्रतिष्ठित व्यवसायीक समूह टाटाले भारतमै आइफोन निर्माण सुरु गर्ने भएको छ । ताइवानको आइफोन निर्माता विस्ट्रन कर्प प्राप्त गर्दै दुई वर्ष भित्रै भारतमै आइफोन उत्पादन सुरु गर्नेगरी टाटाले सम्झौता गरेको हो ।

हालसम्म अमेरिकी प्रविधि कम्पनी आइफोनले चीनमा विशाल मात्रामा आइफोन उत्पादन गर्दै आइरहेको थियो । चीनमा ताइवानी कम्पनी फक्सकनका दुई विशाल फ्याक्ट्रीमार्फत एप्पलका आइफोन उत्पादन तथा विश्वव्यापीरुपमा बिक्री वितरण हुँदै आइरहेको थियो ।
तर, भारतको टाटा समूहले विस्ट्रन प्राप्त गरेसँगै भारतको बेङ्ग्लोर नजिकैको प्लान्टबाट आइफोन उत्पादन हुने भएको हो । टाटाले भारतमा उत्पादन गर्ने आइफोन भारतको आन्तरिक बजार र विश्व बजारमा समेत आपूर्ति हुने बताइएको छ ।

भारतका विद्युत तथा प्रविधि मन्त्री राजिब चन्द्रशेखरले प्रधानमन्त्री नरेन्द्र मोदीको भिजनरी योजनाका कारण भारतमै आइफोन निर्माण सुरु हुन लागेको जानकारी दिए । उनले सामाजिक सञ्जाल एक्समार्फत टाटाले आगामी दुई वर्षभित्र उत्पादन सुरु गर्ने जानकारी दिएका हुन् ।

पछिल्लो समय अमेरिकी प्रविधि कम्पनी एप्पले भारतीय बजारलाई प्राथमिकतामा राख्न थालेको छ । अमेरिका र चीनबिच व्यापार र प्रविधि युद्ध चर्किँदै जाँदा धेरैजसो अमेरिकी कम्पनी चीन छाड्ने होडमा छन् । चीन छाड्ने कम्पनीहरूको पहिलो प्राथमिकतामा भारत पर्ने देखिन्छ ।

यसअघि, एप्पले दुई÷तीन महिना अघि भारतमा आफ्नो पहिलो आधिकारिक स्टोर सञ्चालनमा ल्याएको थियो । भारत यतिबेला विश्वकै सबैभन्दा धेरै जनसंख्या भएको मुलुक हो ।

यस्तै, भारतको अर्थतन्त्र समेत विश्वमा उदीयमान अवस्थामा छ भने भारतीयहरूको आम्दानी समेत उकालो लाग्दै छ । यही सम्भावनालाई मध्यनजर गर्दै एप्पलले भारतीय बजारलाई प्राथमिकतामा राखेको छ ।

विस्ट्रन कर्पको सञ्चालक समितिको बैठकले आफनो सिंगापुर र हङकङमा आधारित कम्पनीको सेयर बिक्रीको स्वीकृत दिएपछि भारतमा आइफोन निर्माण सम्भव भएको हो । टाटाले आइफोन निर्माण सुरु गर्नका लागि विस्ट्रनसँग १२५ मिलियन अमेरिकी डलरको डिल गरेको छ ।

स्रोत : एएनआई