एजेन्सी – आइसिसी विश्वकपमा नेदरल्यान्ड्सले बंगलादेशविरुद्ध सानदार जित निकालेको छ । जितको लागि २ सय ३० रनको विजयी लक्ष्य पछ्याएको बंगलादेश ८७ रनले पराजित भएको हो ।

जवाफी ब्याटिङमा उत्रिएको बंगलादेश ४२.२ ओभरमा १ सय ४२ रनमा अल आउट भयो । बंगलादेशका मेहेदी हसन मिराजले ४० बलमा ५ चौका र १ छक्कासहित सर्वाधिक ३५ रन बनाए । अन्य कुनैपनि ब्याटरले राम्रो प्रदर्शन गर्न सकेनन् ।

त्यसअघि कोलकातामा टस जितेर ब्याटिङ गरेको नेदरल्यान्ड्सले ५० ओभरमा २ सय २९ रन बनाउँदा सबै विकेट गुमायो । नेदरल्यान्ड्सका कप्तान स्कट एडवार्ड्सले सर्वाधिक ६८ रन बनाए ।

यस्तै वेसले बरेसीले ४१ रन जोडे । बलिङतर्फ बङ्लादेशका शोरिफुल इस्लाम, तस्किन अहमद, मुस्ताफिजुर रहमान र मेहदी हसनले समान २ विकेट लिए ।

जारी विश्वकपमा यसअघि नेदरल्यान्ड्सले उपाधि दाबेदार दक्षिण अफ्रिकालाई स्तब्ध पारेको थियो ।