मकवानपुर– मकवानपुरमा स्कुटर दुर्घटना हुँदा एकजनाको मृत्यु भएको । घटनामा एकजना घाइते भएका छन् । 

काठमाडौँ–कुलेखानी–हेटौँडा सडकखण्डअन्तर्गत मकवानपुरको भीमफेदी गाउँपालिका वडा नम्बर ६ जुरिखेतमा काठमाडौँबाट हेटौँडा आउँदै गरेको ०२–०२७–प ४८४२ नम्बर को स्कुटर दुर्घटनामा परेको हो ।

जिल्ला प्रहरी कार्यालयका प्रहरी नायब उपरीक्षक लक्ष्मी भण्डारीका अनुसार स्कुटर चालक काठमाडौँ महानगरपालिका–२७ बस्ने ६५ वर्षका शशीराज पाण्डेकी श्रीमती ६२ वर्षीय राज्यश्री थापा क्षेत्रीको हेटौँडा अस्पतालमा उपचारको क्रममा हिजो साँझ मृत्यु भएको हो । स्कुटर चालक पाण्डेको हेटौँडा अस्पतालमा उपचार जारी रहेको प्रहरीले जनाएको छ ।

काठमाडौँबाट हेटौँडा आउने क्रममा जुरिखेतको ओरालोमा स्कुटर अनियन्त्रित भई सडकबाट करिब एक सय मिटर तल खसेको थियो ।