काठमाडौं– सरकारले वरिष्ठ मुटुरोग विशेषज्ञ प्राडा भगवान कोइराला नेतृत्वले सञ्चालन गर्न लागेको काठमाडौं इन्स्टिच्युट अफ चाइल्ड हेल्थलाई ४१ रोपनी जग्गा उपलब्ध गराउने निर्णय गरेको छ ।

बिहीबार सञ्चार तथा सूचना प्रविधि मन्त्री गोकुल बाँस्कोटाले मन्त्रिपरिषद् निर्णयहरु सार्वजनिक गर्दै डा कोइराला नेतृत्वको टिमको काठमाडौं इन्स्टिच्युट अफ चाइल्ड हेल्थलाई सरकारको नाममा रहेको ४१ रोपनी १० आना ३ पैसा जग्गा लिजमा उपलब्ध गराउने निर्णय  भएको जानकारी दिए ।

बाल अस्पताल सञ्चालनका लागि सरकारले डा कोइरालाको टिमलाई बूढानीलकण्ठ नगरपालिका वडा नम्बर-७ मा रहेको सरकारी जग्गा लिजमा उपलब्ध निर्णय गरेको हो ।

डा कोइरालाले केही दिन अघिमात्रै काठमाडौंलगायत सातै प्रदेशमा विशिष्टीकृत बाल अस्पताल निर्माण गर्ने घोषणा गरेका थिए ।

डा कोइरालले फन्ड कलेक्सनमार्फत गैर नाफामूलक बाल अस्पताल सञ्चालन गर्ने योजना बनाइरहेको बेला सरकारले जग्गा उपलब्ध गराउने निर्णय गरेको छ ।

सरकारले बाल अस्पताल सञ्चालनका लागि जग्गा उपलब्ध गराएपछि डा कोइरालाले खुशी ब्यक्त गर्दै छिट्टै अस्पताल भवन निर्माण प्रक्रिया अघि बढाउने खबरहबलाई बताए ।