काठमाडौं–स्थानीयबासी आफ्नो गाउँको विकासका लागि आफैं जुटेको खबर गोरखापत्र दैनिकले मुख्य समाचारका रुपमा छापेको छ । खोटाङमा निर्माण भएको होलेसुङ–जनकराज राई सडक निर्माणका लागि जनकराज राई एक्लैले झण्डै २७ लाख रुपैयाँ बराबरको आर्थिक योगदान गरेका छन् । उनीजस्तै धेरैले सडक निर्माणका लागि आर्थिक संकलन गर्दै आफू हिँड्ने सडक आफैं बनाउन जुटेका हुन् ।

समायोजनको बाटो खुल्यो शीर्षको समाचारमा प्रतिनिधिसभाको शुक्रबारको बैठकले कर्मचारी विधेयक पारित गरेसँगै कर्मचारी समायोजनको बाटो खुलेको उल्लेख गरिएको छ । विधेयक राष्ट्रियसभाबाट पनि यही फागुन १० गतेभित्रमा पारित भई प्रमाणीकरण हुनुपर्ने छ। विधेयक पारित भएपछि ढिलामा १४ दिनभित्र संसद सेवाका कर्मचारीको समायोजना सकिन्छ ।

त्यस्तै ‘समुन्द्रको छालजस्तै काम अघि बढेको छ’ शीर्षकको समाचारमा सरकारले गरेको एक वर्षको काम र प्रधानमन्त्रीले सरकारको एक वर्षको कामको समीक्षा गर्दै दिएको मन्तव्यलाई समेटिएको छ । प्रधानमन्त्रीले सम्बोधनका क्रममा ‘घरको जग बनाउँदै गरेका छौं, छानो छाएपछि थाहा पाउनुहुनेछ सरकारले के गरेको रहेछ,’ भनेका छन् ।