काठमाडौँ – हमासको आक्रमणपछि इजरायलमा रहेका विद्यार्थीहरूले आफूलाई तत्काल उद्धार गर्न माग गरेका छन् । मंगलबार भिडियोमार्फत विद्यार्थीहरुले आफूहरु नेपाल फर्कन चाहेको भन्दै तत्काल उद्धार गर्न माग गरेका हुन् ।

उनीहरुले भनेका छन्, ‘हामी यहाँ खाना पाएका छौँ, बस्न पाएका छौँ। तर कति बेला माथिबाट आक्रमण गर्छ भन्ने पत्तो छैन । नेपाल सरकारले रेस्क्यु गरे हामीलाई राम्रो हुन्थ्यो । सरकार मिटिङ भन्दा पनि उद्धारको कार्य तत्काल अगाडी बढाओस । यहाँ अरु देशले आक्रमण गर्दैछ भन्ने हामीले सुनेका छौं। यसले हामीलाई थप त्रसित बनाइरहेको छ ।’

साथै उनीहरुले उद्धारका लागि नेपाली दूतावासमा फोन गर्दा पैसा कस्ले तिर्छ भन्ने जवाफ आएको गुनासो गरे । उनीहरुले उद्धार गर्न आवश्यक रकम सरकारले जुटाउन नसक्ने भए आफूहरुले जुटाउने समेत बताएका छन् ।

‘दूतावासमा फोन गर्दा पैसाको जिम्मा कस्ले लिने भन्ने जवाफ आयो । हामी पैसा तिर्न तयार छौँ । सरकारले पैसाको जिम्मा लिन सक्दैन भनोस् । हामी घरपरिवारलार्ई पैसाको जोहो गर्न भन्छौ,’ विद्यार्थीहरुको गुनासो छ ।

शनिबारदेखि कट्टरपन्थी समूह हमासले इजरायलमा आक्रमण गर्दा त्यहाँको अवस्था तनावपूर्ण बनेको छ । उक्त आक्रमण परी १० जना नेपाली विद्यार्थीको मृत्यु भएको थियो । भने चार जना घाइते भएका थिए ।