काठमाडौँ- नेपाल चिकित्सक संघले आन्दोलनरत चिकित्सकहरुको माग पूरा गर्न सरकारसँग आग्रह गरेको छ । संघले विज्ञप्ति जारी गर्दै आन्दोलनरत चिकित्सकहरुको माग पूरा गर्न माग आग्रह गरेको हो ।

संघका महासचिव सन्जिव तिवारीले जारी गरेको विज्ञप्तिमा देशका विभिन्न स्थानमा चिकित्सक तथा स्वास्थ्यकर्मीहरुमाथि सांघातिक आक्रमण गरी गम्भीर घाइते बनाइएको, स्वास्थ्यजस्तो संवेदनशील क्षेत्रलाई आतंकित पारी शान्तिपूर्ण वातावरणमा स्वास्थ्य सेवा प्रवाहमा खलल पुर्‍याइएको तथा अस्पताल नै तोडफोड गरिएका घटनाको विरोधमा जारी आन्दोलनमा संघको ऐक्यबद्धता रहेको उल्लेख गरिएको छ ।

आन्दोलनका कार्यक्रममा आफूहरुले समन्वयकारी र मध्यस्थकर्ताको भूमिका निर्वाह गरेको उल्लेख गर्दै विज्ञप्तिमा गृहमन्त्री, स्वास्थ्यमन्त्री, गृह तथा स्वास्थ्य मन्त्रालयका सचिव तथा पधाधिकारीलगायतसँग छलफल गरेको जनाइएको छ ।

विज्ञप्तिमा आन्दोलनरत चिकित्सकहरुले उठाएका मागहरु तत्काल सम्बोधन नभए अझ सशक्त ढंगले थप आन्दोलन गर्ने चेतावनीसमेत दिइएको छ ।