काठमाडौँ– नेकपा एमालेको बागमती प्रदेश अधिवेशन दुई दिन लम्बिएको छ । हिजोसम्मका लागि निर्धारित अधिवेशन प्रदेशको भावी नेतृत्वमा सहमति हुन नसक्दा दुई दिन लम्बिएको हो ।

अधिवेशन अन्तर्गत आजका लागि निर्वाचन कार्यतालिका सार्वजनिक भएको छ । निर्वाचन समितिले आज बिहान ८ बजेदेखि निर्वाचन कार्यक्रम सुरु गर्नेछ । 

तालिकाअनुसार बिहान ९ बजे अन्तिम मतदाता नामावली प्रकाशन हुनेछ भने ९ देखि ११ बजेसम्म उम्मेदवारी मनोनयन गरिनेछ । यस्तै अपराह्न ४ बजे उम्मेदवारी फिर्ता लिने समय छुट्याएको निर्वाचन समितिले अपराह्न ५ बजे मात्रै उम्मेदवारको अन्तिम नामावली प्रकाशन गर्ने जनाइएको छ ।

विद्युतीय मतदानबाट नेतृत्व चयन गर्न लागेको बाग्मती एमालेले भोलि बिहान ११ बजेबाट पार्टी कार्यालय च्यासलमा मतदान हुने जनाएको छ । अधिवेशनमा ११ सय ७४ मतदाता रहेका छन् । 

यसअघि हिजो भएको बन्द सत्रमा विभिन्न १६ वटा प्रस्ताव सहितका सांगठनिक, राजनीति र आर्थिक प्रतिवेदन पारित भएका छन् ।

बन्द सत्रमा प्रस्तुत गरिएका प्रतिवेदन माथि विभिन्न सातवटा समूह बनाएर छलफल गरिएको थियो । बन्दसत्रमा प्रस्तुत प्रतिवेदन सुझाव सहित पारित भएको छ ।