धरान–नेपाल कम्युनिस्ट पार्टी नेकपाका सचिवालय सदस्य तथा उपप्रधानमन्त्री ईश्वर पोखरेलले नेतृत्वको आलोचना गर्दै सामाजिक सञ्जालमा नपोखिन कार्यकर्तालाई निर्देशन दिएका छन् ।

अगुवा कार्यकर्ताको भेलालाई सम्बोधन गर्न धरान पुगेका उनले पार्टीले देशको समग्र पाटोलाई परिवर्तन गर्ने भन्दै साना तिना कमिकमजोरीमा फेसबुकलगायतका सामाजिक सञ्जालमा पोखिनुपर्ने अवस्था नरहेको बताए ।

पार्टी एकीकरणको प्रक्रिया र नेतृत्वले गर्न नसकेको कामको बारेमा सामाजिक सञ्जालमा टिक्का टिप्पणी गर्ने कार्यकर्ता प्रति निक्कै रुष्ट देखिएका पोखरेलले पार्टीमा निरन्तर अपडेट नहुने कार्यकर्ता आउट हुने चेतावनी दिए ।

नेकपाका केन्द्रिय सदस्य तथा सुनसरीका इन्चार्ज धर्म निरौलाको नाम नै तोकेर सचिवालय सदस्य पोखरेलले सामाजिक सञ्जालमा पोखिने भावनाले आफैंलाई घाटा गर्ने भन्दै आलोचना गरे ।

उनले आम जनता र दुवै पार्टीका कार्यकर्ताको भावना अनुसार नै पार्टी एकता गरिएको बताए । अब चाँडै नै एकता प्रक्रियाले पूर्णता पाउने र सबैले जिम्मेवारी पाउने पनि स्पष्ट पारे ।