इस्लामावाद- पाकिस्तानको प्रशासनमा रहेको कश्मीरमा पाकिस्तानविरोधी प्रदर्शन तीव्र बन्दै गएको छ । उच्च मूल्यवृद्धि, खाद्यान्नको अभाव र करको उच्च दरका कारण जनजीवन अस्तव्यस्त भइरहेको अवस्थामा पाकिस्तान प्रशासित कश्मीरमा विरोध प्रदर्शनको आयोजना गरिएको हो ।

पाकिस्तान प्रशासित कश्मीरका अभियन्ताले आफूहरुलाई पाकिस्तानबाट मुक्त गर्न भारतीय प्रधानमन्त्री नरेन्द्र मोदीसमक्ष आह्वानसमेत गरेका छन् ।

पाकिस्तान प्रशासित कश्मीरका अभियन्ता शबिर चौधरीले सामाजिक सञ्जालमा भिडियो पोस्ट गर्दै आफ्नो क्षेत्रमा लोडसेडिङ, खाद्यान्नको अभाव, असुरक्षा र करको उच्च दरका कारण आफूहरु पीडित भएको भन्दै पाकिस्तानबाट मुक्त गर्न मोदीसमक्ष आह्वान गरेका हुन् ।

पाकिस्तानले कश्मीरमा रहेको प्राकृतिक स्रोतको दोहन गरिरहेको र भ्रष्टाचार एवम् खराब नीतिका कारण सो क्षेत्रमा जीवनस्तर खस्किँदै गएको बताइन्छ ।

पाकिस्तानमा पछिल्लो तीन महिनामा विद्युतको भाउ दोब्बर भएको छ भने पिठो, चामललगायतका अन्य अत्यावश्यक वस्तुको मूल्य पनि अकाशिएको छ ।