इस्लामावाद- पाकिस्तानमा पुनः पोलियोको सङ्क्रमण फेला परेको छ । पाकिस्तानको स्वास्थ्य मन्त्रालयले पूर्वी पञ्जाब प्रान्तको राजधानी लाहोरमा पोलियाको सङ्क्रमण फेला परेको जानकारी दिएको हो ।

यससँगै लाहोरमा यस वर्ष देखिएको यो चौथो पोलियो सङ्क्रमण हो । लाहोरमा फेला परेका चारमध्ये पोलियोको तीन केसको अणुवाशिंक परीक्षण गर्दा यस सङ्क्रमण अफगानिस्तानमा फेला परेको भाइरससँग मेल खाएको मन्त्रालयको भनाइ छ ।

यस वर्षमात्रै पोलियोका कारण मुलुकका दुई बालबालिकामा पक्षघात भएको पाकिस्तानी स्वास्थ्य मन्त्रालयलाई उद्धृत गर्दै भारतीय समाचार संस्था एएनआईले जनाएको छ । दुबै बालबालिका खैबर पख्तुनख्वा प्रान्तको बान्नु जिल्लाका रहेको जनाइएको छ ।

पछिल्लो समय पाकिस्तानले पोलियो उन्मूलनका लागि व्यापक खोप अभियान सञ्चालन गरिरहेको भएपनि अपेक्षित सफलता हासिल हुन नसकेको एएनआईले जनाएको छ ।