काठमाडौं- चीनका पूर्वप्रधानमन्त्री ली पेङ्गको निधन भएको छ । उनको ९० वर्षको उमेरमा निधन भएको चिनियाँ सरकारी सञ्चारमाध्यमहरूले जनाएका छन्।

पेङ्गको बुढ्यौलीका कारण वा अन्य कुनै रोगका कारण निधन भएको भन्ने चाँही खुलाइएको छैन ।

चीनको प्रधानमन्त्री भएका बेला पेङ्ग सन् १९८४ मा नेपाल भ्रमणमा आएका थिए। उनी सन् १९८० र १९९० को दशकसम्म प्रधानमन्त्रीसहित विभिन्न शीर्ष तहमा बसेर काम गरेका थिए ।

सन् १९८९ मा बेइजिङको तियानआन्मेन स्क्वाएरमा प्रजातन्त्र पक्षधरहरू माथि भएको दमनका लागि उनी ‘बुचर अफ बेइजिङ’को नाममा सबैभन्दा बढि चिनिने बीबीसीले उल्लेख गरेको छ ।

तियानआन्मेन घटनामा सेनाले सयौं निशस्त्र नागरिकहरूको हत्या गरेको थियो। तर पेङ्गले साँच्चिकै सेनालाई आदेश दिएका थिए वा थिएन भन्ने चाहिँ स्पष्ट छैन।
सन् २०१७ मा सार्वजनिक केही अभिलेखका अनुसार सो घटनामा १० हजारभन्दा बढी मानिसको मृत्यु भएको थियो भनिएपनि संख्या अझै एकीन र स्पष्ट छैन ।

चीनमा शासन गर्ने कम्युनिस्ट पार्टीले सो घटनाको उल्लेख गर्न पनि निषेध गर्ने गरेको छ।