काठमाडौँ- राष्ट्रिय अनुसन्धान विभागका पूर्व प्रमुख हरिबाबु चौधरीले केही दिनअघि चिनियाँ राजदूत छोन सङले दिएको अभिव्यक्ति कूटनीतिक मर्यादा विपरीत भएको बताएका छन् ।

राष्ट्रिय एकता अभियानले बिहीबार काठमाडौँमा आयोजना गरेको ‘चीन सम्बन्धः गैर कूटनीतिक अभ्यास’ कार्यक्रममा बोल्दै उनले राजदूत छोनले कूटनीतिक मर्यादा मिचेको बताएका हुन् । गैर जिम्मेवार अभिव्यक्ति दिने जो कोहीलाई पनि कारबाही गर्नुपर्ने उनको भनाई छ । चौधरी राष्ट्रिय अखण्डताको रक्षाका लागि सबै एकजुट हुनुपर्ने बताए ।

यस्तै अभियानका अध्यक्ष विनय यादवले चिनियाँ राजदूतको गैर कूटनीतिक चहलपहल बढेको आरोप लगाएका छन् । नेपालको संस्कृति र धर्म नस्ट गर्न चीन लागिपरेको भन्दै यादवले नेपाललाई तिब्बतीकरण गर्ने चीनको योजनालाई असफल बनाउन एक जुट हुनुपर्ने बताए । उनले नेपाली भूमि चिनियाँ नयाँ नक्सामा समेटिएको भन्दै विरोध पनि जनाए ।

यता अभियानका वरिष्ठ नेता वीपी यादवले चिनियाँ राजदूतको अभिव्यक्तिले मित्र राष्ट्रहरुको सम्बन्धमा असर पार्ने बताए । राजदूतमाथि कारबाही प्रक्रिया अगाडी बढाउनु पर्ने उनको माग छ ।

यस्तै वरिष्ठ पत्रकार युगनाथ शर्मा पौडेलले चिनियाँ राजदूतले नेपाललाई युद्धमा धकेल्न खोजेको आरोप लगाए । भारत–चीनको युद्धमा नेपाललाई नमुछ्न उनले चेतावनी दिए ।

त्यस्ते विश्लेषक बुद्ध छिरिङ मोक्तानले चिनियाँ राजदूतको खुलेर विरोध गरे । प्राध्यापक विजय महासेठले नेपालमा चीन वा भारत कुनै पनि देशका विरुद्ध गतिविधि गर्न नहुने बताए ।